الكسكسى البيتى

الكسكسى البيتى

المقادير :

كيلو دقيق-نص معلقة ملح صغيره-كوب ونصف ماء للعجن +كيس للبن نيدو 

الطريقه :

هنفرغ الدقيق فى طبق للعجن ونحط كيس للبن نيدو ونرش عليه الملح ونقلبه كويس ونرش عليه المايه رش خفيف
نفركه بأدينا لحد ما يبقى مفرفط
ونحطه فى المنخل بتاع الكسكسى ونزل الكسكسى منة عشان يبقى مرمل كدة وميبقاش معجن
نجيب صنيه واسعه ونفرش فيها قطعة قماش من الشاش اوطرحه قديمه ويفضل انها تكون لونها ابيض ونفرغ فيها الكسكسى المفروم
بعد ما ننتهى من فرم الكسكسى نلمه فى قطعة القماش شاش ونحطو فى مصفا
حبه بي حبه على القماشه
وهاتي حله فيها ميه عشان يستوي علي البخار وهاتي المصفا وحطي فيها الكسكسي بالقماشة وهادي النار وغطي علية والبخار هيطلع علي المصفا ويسوي الكسكسي لمدة ربع ساعة مثلا

عاوزاكى تخبطى بايدك على قطعة القماش هتسمعى صوت مكتوم وده علشان لما يكون لسة مستواش ولما يستوى هتخبطى عليه وهتسمعى صوت زى صوت الطبله كده معناها انه استوى (انا بقولك كده علشان تعرفى الفرق) هنفتح القماشه وتقلبي بشوكه
وبعد كده نخدو ونجيب منخول بتاع الكسكسي وننخلو بعد ما يستوي ونجيب حوالى كوب ماء ونرشة علية تانى وبعدين نحطة تانى فى القماشة ونحطة فى المصفا يكمل سواة من تانى ونتركة يستوى حوالى نصف ساعة

وبعد ما يستوى نفرغة فى طبق غويط ونضع علية السمنة البلدى ويقلب جيدا
ونطلع منو وعلي الاكل علي طول وحطي سكر بودره عليه او مكسرات او حسب رغبتك
بالف هنا وشفا ليكم . ملحوظة:حوالين المصفاة والحلة اللى تحتها نعمل عجينة بمية ودقيق تكون متماسكة ونلفها حولين المصفا والحلة بحيث ميخرجش البخار خالص منها يبقى كل البخار طالع على الكسكسى عشان يستوى صح
ملحوظة : ممكن تعملية بالكبة او المطحنة عشان يكون اسهل عليكى وبيطلع بنفس النتيجة بردوا